Agasallo.eu

A Unidade Técnica de Normalización Lingüística da Deputación da Coruña, xunto coa Coordinadora de Traballadores/as de Normalización da Lingua (CTNL) editaron Agasallo (www.agasallo.eu), unha guía que inclúe unha selección de novas creacións e produtos, de libros, discos, aparellos electrónicos, fragrancias, camisolas, cinema, xogos, etc. E, aínda que necesariamente só poden estar algúns dos que son, son todos os que están. Porque todas as ideas que inclúe este catálogo teñen unha cousa en común: a lingua galega.

A personaxe mítica do Nadal galego que lle trae agasallos aos nenos e ás nenas na noite de fin de ano, o Apalpador, fala galego e dispón de todos os agasallos que aparecen nesta guía. Ao Papá Noel e mais aos Reis Magos, que falan todas as linguas do mundo, failles tamén moita ilusión que en cada lugar se fale e apoie a lingua propia e que, polo tanto, apoiemos os produtos e creacións en galego.

Por estas razóns, desde a Deputación da Coruña, desde a CTNL e desde todos os servizos de normalización lingüística (SNL) da provincia da Coruña se quere contribuír a visibilizar a lingua galega e a recomendar os agasallos que a usan, que son moitos, e dos que na guía figuran algúns.

Así, quérese contribuír a difundir socialmente os produtos de agasallo en galego de todo tipo e para todas as idades; a promocionar os produtos culturais e, polo tanto e ao mesmo tempo, a promocionar a nosa música, a literatura, o cinema, etc. Deste xeito procúranse aproveitar as festas do Nadal para promocionar a lingua galega para contribuír a que estea presente na vida social cotiá e no lecer.

Do catálogo Agasallo editáronse 45.000 exemplares, que foron enviados a todos os concellos da provincia e que serán distribuídos principalmente a través dos 46 servizos de normalización lingüística (SNL) que existen nos diversos concellos da Coruña. Tamén está dispoñíbel a través do enderezo web www.agasallo.eu.

No concello de Zas distribuiranse 500 exemplares nos centros de ensino de primaria, secundaria e bacharelato.

www.agasallo.eu

Presentación do libro “A Terra de Soneira. No corazón da Costa da Morte”

Venres día 10 de decembro

19: 30 h

Auditorio do Pavillón Polodeportivo de Baio

Asistirán os autores, Xosé María Lema Suárez (Coordinador/a), Evaristo Domínguez Rial, Xan Fernández Carrera, Roberto Mouzo Lavandeira,  e Xosé María Rei Lema, o alcalde do Concello de Zas, Manuel Muíño Espasandín e o director de Edicións Xerais de Galicia, Manuel Bragado.


O libro comeza cunha xustificación da personalidade específica da comarca demostrando con documentos e cartografía histórica a existencia dun territorio diferenciado con este nome desde hai mil cen anos. Os dous seguintes apartados non adoitan figurar nas guías habituais: a análise da forma de falar dos soneiráns e un estudo sobre os apelidos máis frecuentes desta zona. Logo vén unha intrudución xeográfica: natureza e paisaxe, onde se diferencia a Soneira interior e unha máis reducida Soneira da beiramar. Ofrécese despois unha visión da historia da comarca desde os tempos prehistóricos aos contemporáneos e, a continuación, as ricas manifestacións artísticas desde o megalitismo á actualidade. Tamén se considera de interese o rico patrimonio etnográfico, de aí a necesaria referencia á arquitectura popular e etnográfica (a casa labrega e mariñeira, os hórreos, os muíños, os batáns etc.). Sen esquecer a referencia á senlleira e refinada artesanía soneirá, que ten no encaixe de Camariñas unha recoñecida proxección universal e na recuperación dos labores do liño un modelo a seguir de como a recuperación dos vellos oficios pode servir de elemento dinamizador dunha comarca. Outros dos aspectos importantes son os persoeiros nacidos nalgún dos tres concellos, a rica gastronomía, as festas tradicionais máis importantes, os eventos instituídos modernamente con notorio éxito de público: o festival folk da Festa da Caballeira de Zas, o Asalto ao Castelo de Vimianzo, as rapas das bestas…

Un apartado especial son as rutas para coñecer a comarca. Propóñense rutas xerais e rutas específicas como a arqueolóxica ou a dos Penedos de Pasarela, os de Traba, os do Piñeo, os do Penal do Veo e os do Corveiro.


Ficha do libro

A Secretaría Xeral de Política Lingüística convoca un concurso de presentacións de Nadal

Bule e participa!

Anímate a construír unha presentación de Nadal electrónica para felicitar estas festas. Coas presentacións máis xeitosas elaboraremos unha galería para que este Nadal rule en galego na rede.

Envíanos a túa proposta antes do 20 de decembro e poderás gañar un lote de produtos de lecer.

BASES

1. A Secretaría Xeral de Política Lingüística convoca un concurso de presentacións de Nadal en formato dixital para promover o uso da lingua galega na comunicación propia destas festas e no ámbito das novas tecnoloxías.

2. As presentacións (en formato .ppt, .pptx ou .odp) deben incorporar texto e este ha ser redactado en lingua galega. Evitarase incorporar audio, a non ser que este sexa de autoría propia.

A extensión máxima da presentación é de dez diapositivas.

3. O tema das presentacións debe estar vinculado ao Nadal (para felicitar o Aninovo, Día de Reis, Festa de Nadal en xeral etc.).

4. As presentacións deben ser orixinais e non poden estar publicadas previamente nin premiadas noutros certames.

5. Os traballos seleccionados formarán parte dunha galería de presentacións que estará dispoñible no espazo web da Secretaría Xeral de Política Lingüística (www.xunta.es/linguagalega)

6. O envío das presentacións farase por correo electrónico ao seguinte enderezo: secretaria.xeral.politica.linguistica.web@xunta.es

Formato da mensaxe:

Asunto: concurso Nadal 2010
A mensaxe non debe vir asinada, senón que debe anexar, xunto coa presentación, un documento de texto no que conste o nome e apelidos do autor/a e, opcionalmente, un teléfono de contacto.

A conta de correo remitente será o contacto co autor ou autora.
A data límite de envío de presentacións é o 20 de decembro de 2010.

7. O xurado estará formado por persoal técnico da Secretaría Xeral de Política Lingüística, que escollerá as tres mellores presentacións que obterán premio, así como a selección de traballos que formarán parte da galería exposta na web de Política Lingüística.

O xurado dará a coñecer a súa decisión antes do día de Nadal.

8. Outorgaranse tres premios consistentes nun lote de produtos de lecer en galego (libros, cómics e cds e dvds) para cada un dos gañadores ou gañadoras. Non se entregará máis dun premio por participante.

9. As fotografías, imaxes, mensaxes e, en xeral, calquera contido empregado, así como calquera reclamación en relación cos mesmos, son responsabilidade exclusiva dos autores das presentacións.

10. A participación neste concurso implica a autorización automática á Secretaría Xeral de Política Lingüística para publicar a presentación. Así mesmo, a Secretaría Xeral de Política Lingüística reserva para si o dereito de corrixir os erros lingüísticos que poidan aparecer no texto, co fin de evitar a difusión de presentacións incorrectas.

11. A participación neste concurso supón a aceptación destas bases e do ditame do xurado.

Concurso de Nadal (SXPL)

Comezar con Ubuntu. Linux en galego

Comezar con Ubuntu 10.04 é unha guía para principantes do sistema operativo Ubuntu. Está escrita cunha licenza de código aberto e é de balde para descargar, ler, modificar e compartir. O manual axudaralle a familiarizarse coas tarefas diarias: navegar pola Web, escoitar música ou escanear documentos. Poñendo énfase na sinxeleza ao seguir as instrucións, e é axeitado para todos os niveis de experiencia.

Editada pola Concellaría de Cultura e Patrimonio do Concello de Dodro e a Oficina de Software Libre da USC, patrocinada pola Xunta de Galicia e a Deputación da Coruña e coa colaboración do Proxecto Trasno.

Ubuntu en galego

Comezar con Ubuntu

SNL do Concello de Zas is powered by Wordpress | WordPress Themes